Die geliefde Suid-Afrikaanse kunstenaar en musikant, Stephan Visagie, het op 11 Oktober 2024 sy nuutste enkelsnit, “Tyd Om Te Groet,” vrygestel op alle digitale platforms. Hierdie liedjie, wat oorspronklik agt jaar gelede geskryf is, dra ‘n diep persoonlike boodskap en weerspieël Stephan se emosionele reis tydens sy tyd in die Kaap.
Stephan verduidelik dat “Tyd Om Te Groet” ontstaan het toe hy ver van sy familie en vriende gevoel het, wat hom laat besluit het om terug noordwaarts te keer. “Dit was op daardie tydstip dat ek gevoel het dit is tyd om die Kaap te groet,” sê hy. Interessant genoeg het Stephan met die heropname van die liedjie en sy amptelike vrystelling besluit om weer terug Kaap toe te trek, wat die ironie van die lewe beklemtoon.
Hoewel Stephan nie gereeld liedjies skryf oor sy persoonlike lewe nie, is “Tyd Om Te Groet” die uitsondering. “Die lirieke weerspieël my verlange na Pretoria en my familie, en die heropname help my om die nostalgie van daardie tyd weer vas te vang,” sê hy. Die liedjie het ‘n spesiale betekenis vir hom omdat dit daardie gevoel van verlange en huis toe gaan verwoord.
Met hierdie vrystelling wil Stephan ‘n sterk boodskap oordra: as ‘n plek, mens, of situasie nie meer vir jou lekker is nie, is dit tyd om te groet. “Daar is altyd nuwe plekke om te sien en nuwe mense om te leer ken,” verduidelik Stephan. Hy moedig mense aan om nie uit te stel om by geliefdes te wees nie, want die lewe is te kort om op die verkeerde plek vas te steek.”Tyd Om Te Groet” is nou beskikbaar op alle digitale platforms.
