In die spoor van sy suksesvolle lied, “Bring My Terug (H2-A)”, het Logan Pietersen die harte van Suid-Afrikaners oor die hele wêreld geraak. Nou kom hy terug met ‘n nuwe lied, “Afrikaner Boervrou”, wat op 12 April 2024 op alle digitale platforms vrygestel is, dit is ’n hartroerende huldeblyk aan die sterkte, deursettingsvermoë, en waarde van ons Suid-Afrikaanse vroue.
Sy eerste lied het ‘n groot impak gehad, veral onder vroue wat met die emosies in sy musiek kon identifiseer. Hulle het hom genader en gevra vir ‘n lied wat hul eie stories kan vertel. Hierdie vroue, wat elke jaar afskeid moet neem van geliefdes, het Pietersen se hart geraak. Hulle persoonlike verhale van liefde en verlies het hom geïnspireer om hul ervarings uitbeeld en om ’n stem te gee aan die ongesiene, maar onmiskenbare krag wat deur vroue in Suid-Afrika en verder daarbuite gedra word.
“Afrikaner Boervrou”, is ‘n lied wat ontstaan het uit diep nadenke en ‘n soeke na positiewe betekenis te midde van moeilike tye. Met die besef dat families en mense wat hy nie eers ken nie so geraak word deur sy musiek, het hy gekyk na die sterk vroue in sy eie lewe, veral die sterk boervroue wat hom gevorm het. Logan het toe die drang gevoel om vir elke vrou net weer dankie te sê en hulle met hierdie liedjie te eer.
Deur sy eie persoonlike reis van verlies en liefde het Pietersen ook baie geleer wat ‘n inspirerende effek tot die skepping van hierdie lied gelei het. Hy moedig mense aan om dankbaar te wees vir die spesiale vroue in hul lewens en om elke dag te waardeer. “Afrikaner Boervrou” is ‘n boodskap van liefde, dankbaarheid en eenheid wat Pietersen deur sy musiek wil deel met die wêreld.
