Die geliefde Suid-Afrikaanse musiekgroep, VanCoet, stel met groot opwinding hulle nuutste enkelsnit, “Slegte Gewoontes”, op 11 Oktober 2024 op alle digitale platforms vry. Hierdie snit is ‘n kragtige weerspieëling van die menslike geneigdheid om vas te hou aan dinge of mense wat nie altyd goed vir ons is nie, maar wat ons tog op een of ander manier bly geniet.
Volgens Ruben, een van die lede van VanCoet, is die liedjie geïnspireer deur die idee dat almal verskillende persepsies het oor wat goed of sleg is vir ‘n persoon. “Op die ou einde maak dit nie regtig saak nie. Wat vir een persoon ‘n ‘ontvlugting’ kan wees, mag vir iemand anders as ‘n negatiewe invloed gesien word,” verduidelik hy. Hierdie konsep vorm die hart van die liedjie se boodskap — die subjektiewe aard van ‘slegte gewoontes’ en die menslike neiging om soms vas te klou aan wat nie altyd reg is vir ons nie.
VanCoet deel dat hulle ‘n sterk emosionele konneksie met die lirieke van “Slegte Gewoontes” het, aangesien dit verwys na iemand wat eintlik ‘n slegte invloed op jou lewe het, maar vir een of ander rede kan jy nie loskom nie. “Ons vergelyk die persoon met alles wat sleg is vir jou, maar dit is daardie slegte gewoontes waarvan jy steeds hou,” sê Ruben. Die liedjie neem luisteraars op ‘n reis van selfbesinning oor die mense en gewoontes in hul lewens wat hulle nie kan los nie, al weet hulle dit is nie altyd goed vir hulle nie.
Met “Slegte Gewoontes” wil VanCoet aan hulle luisteraars oordra dat dit reg is om ‘n paar ‘slegte gewoontes’ in jou lewe te hê — solank jy dit geniet en weet waar om die lyn te trek. Die lewe is vol mense wat kom en gaan, party is goed vir jou en ander nie, maar dit bly jou verantwoordelikheid om die balans te vind en voluit te lewe. Die groep se kenmerkende energie en unieke styl is weereens sigbaar in hierdie treffende snit wat ‘n diep, maar relatiewe boodskap dra.
Die musiekvideo vir “Slegte Gewoontes” is ook ‘n hoogtepunt wat saam met die vrystelling gedeel gaan word. Die groep het dit geniet om saam met ‘n paar van hul beste vriende te werk aan die video — mense wat ‘n groot deel van hulle lewens is, en natuurlik, ook ‘n paar ‘slegte gewoontes’ met hulle deel. Hierdie vriendskappe en die pret wat hulle saam het, is die perfekte agtergrond vir ‘n video wat ewe speels en betekenisvol is.
Kyk uit vir “Slegte Gewoontes” op 11 Oktober 2024! Gaan luister na hierdie opwindende nuwe enkelsnit op jou gunsteling digitale platform. Bly ingeskakel op VanCoet se sosiale media vir opdaterings oor die vrystelling van die musiekvideo en die verdere avonture van die groep.
Geniet die liedjie op die platform van jou keuse – https://linktr.ee/vancoet
