Zaan Sonnekus het onlangs sy nuutste enkelsnit, “Die Korste Hier”, die 3de Mei 2024 op alle digitale platforms vrygestel. Hierdie liedjie, wat ‘n unieke mengsel van eenvoudige oorsprong en dieper betekenis weerspieël, beloof om die Afrikaanse musiekbedryf landwyd te laat gons.
“Die Korste Hier” het ontstaan uit ‘n lighartige opmerking tydens ‘n vriendskaplike gesprek. Na ‘n aand vol avontuur het een van Zaan se vriende homself ‘die coolste’ genoem, waarop Zaan vinnig en speels geantwoord het dat hy miskien eerder “die Korste” is. Hierdie oomblik van spontaneïteit het ‘n kern van waarheid blootgelê en die kiem van die liedjie geplant.
Vir Zaan is die liedjie egter meer as net ‘n grappige staaltjie verwerk in musiek. Dit verteenwoordig ‘n dieper boodskap oor die belang van eerlikheid en selfverwesenliking in die musiekbedryf. Hy glo dat die alternatiewe musiekgenre dikwels onderskat word in vergelyking met die meer kommersiële popmusiek wat uitgereik word. Hierdie liedjie is ‘n oproep aan musiekliefhebbers om nie net die voorgeskrewe musikale pad te volg nie, maar om hul passie te volg en eg aan hulself te bly.
In die bygaande musiekvideo van “Die Korste Hier” sluit Zaan verskeie persoonlikhede in wat ook teen die stroom ingegaan het om hul drome te bereik. Van UFC-kampioen, Dricus Du Plessis, sosiale media en TV persoonlikhede soos Talitha Joubert en Angelique Gerber tot die legendariese Francois van Coke wat aan die voorpunt was om die genre van alternatiewe rock te maak wat dit vandag is. Hierdie mense dien as inspirasie vir die boodskap van die liedjie: bly altyd eg aan jouself en jou passies, maak nie saak hoe uitdagend dit mag lyk nie of hoeveel mense jou mismoeddig laat voel nie.
Met “Die Korste Hier” bring Zaan Sonnekus ‘n liedjie uit wat nie net ‘n oorlewering van kreatiwiteit is nie, maar ook ‘n aansporing vir individue om hul unieke stemme te laat hoor in ‘n wêreld van musiek wat dikwels die gemaklike pad kies.
